إلقاء القبض على جوليان أسانج
هاد النهار بالظبط 11/04/2019 غادي يتصنف من أسوء الايام فتاريخ الحرية أو الصحافة علاش ؟ بكل بساطة حيت تم إلقاء القبض على جوليان أسانج لي كان مخبي فالسفارة ديال الإكوادور ف لندن كلاجئ من 2012 - لاخروج لا دخول.
أسانج بزاف دالناس ماكايعرفوهش رغم انه خاص كولشي يعرفو حيت الوحيد فالعالم لي المنظمة ديالو قدرات تزعزع و تفضح اقوى دول العالم. غاتقولي كيفاش ؟
جوليان عندو 47 عام, خبير معلوماتي ومبرمج أسترالي و هو المؤسس ديال ويكيليكس Wikileaks لي بدات 12 العام هادي لي مهمتها من اللول هي تفضح المجرمين دالعالم - حكومات - رؤساء - استخبارات - تهرب ضريبي - اختلاسات و جرائم الحروب.
ويكيليكس سربات الألاف لا مقلناش الملايين ديال الملفات على جميع هاد الأمور لي ذكرنا و كان خاص الحكومات يشوفو كيفاش يوقفو هادشي ولكن التسريبات كانت ماكاتحبسش. ويكيليكس كاتخدم بواحد الطريقة لي فريدة منوعها بحيت كاتستقبل المعلومات من عند هاكرز لي فالمنظمة و كاتأكد منهم و تاتسربهم. فضحو ملفات ديال اليمن سوريا السعودية السودان و العراق و زيد و زيد لكن غانهضرو على باشمن تهمة تشد جوليان أسانج و الطريقة كيفاش تشد. ف 2010 ويكيليكس سربات واحد الفيديو,
هاد الفيديومأخود ف 2007 بكاميرا ديال أباتشي. فيه جنود د ميريكيان فبغداد - العراق تايتيريو فمجموعة د الناس منهم صحفيي رويترز بكل برودة دم و بحال لا تايلعبو ألعاب الفيديو رغم أن الضحايا كانو مامسلحينس و غير مدنيين. هادشي دار روينة ديك الوقت و ميريكان كاملا تهزات , و هنايا ميريكان غاتدير جوليان فبين عنيها, بدات البحت و لقات بلي لي سرب هاد الفيديو هي الجندية الأمريكية شيلسي مانينغ -31 سنة - لي تشدات ف 2013 بتهمة التجسس و تسريب معلومات حساسة و هي بدورها اعتارفات بلي الفيديو صحيح و هي لي سربات كثر من 750,000 معلومة سرية ل ويكيليكس.
علاش جبدنا شيلسي حيت بكل بساطة عندها علاقة بالتهمة لي تشد بيها جوليان هاد النهار وهي تهمة التعاون أو التأامر لاختراق حاسوب حكومي فيه معلومات سرية. لكن علاش ماشدوهش من شحال هادي؟ أسانج كان لاجئ فالسفارة د الإكوادور فلندن تحت واحد الإتفاقية لي كاتنص بلي ممنوع تسلم شي حد طلب اللوجوء لشي حد لي غايهدد السلامة ديالو او الحرية ديالو مهما كانت الأسباب. لكن لي وقع هاد النهار فهو خرق للمادة 33 من هاد الإتفاقية و السبب كيف وضحات ويكيليكس انه ميريكان ضغطات بجميع الطرق على الإكوادور باش يلقاو حل لمؤسس ويكيليكس حيت كاحدو حر فماغاديش يديرو الجرائم ديالهم بسرية ولا جرائم الحرب ديالهم غاتفضح كاملا واحد النهار.
ف السؤال كايبقا هو كيفاش ويكيليكس غاتصرف معا هادشي لي وقع اليوم أو بالأحرى كيفاش المنظمات الحقوقية العالمية غايتعاملو مع الأمر. الخلاصة هو القبض على أسانج اليوم يقدر يكون انطفاء لأخر شمعة فتاريخ الصحافة النزيهة و الشفافة.
هادشي كان المختصر ديال بزاااف د الحوايج على ويكيلكس و أسانج. https://wikileaks.org/
بعض من الأعمال ديال جوليان و لي تعملات عليه كافلام و وثائقيات , كتب:
https://www.youtube.com/watch?v=qug9XD6y0BE
https://www.youtube.com/watch?v=1teM525rVlc
https://en.wikipedia.org/wiki/Cypherpunks_(book)
تظهر الإعلانات هنا
تعليقات